“Амерыканскі бежанец”, якога паказвалі па дзяржТБ, вярнуўся дадому

Амерыканец, які атрымаў у Беларусі палітычны прытулак, вярнуўся ў ЗША, піша “Свабода” са спасылкай на ўласныя крыніцы.

Грамадзянін ЗША Эван Ньюман пераехаў у Беларусь у 2021 годзе. У ЗША яго падазравалі ў 14 злачынных эпізодах, у тым ліку ў штурме Капітолія і нападзе на афіцэраў паліцыі. Менш чым праз год жыцця ў Беларусі ён атрымаў тут палітычны прытулак і часта выказваўся на беларускіх дзяржаўных тэлеканалах. Ён пазітыўна выказваўся пра чысціню вуліц і дакладнасць у раскладах руху грамадскага транспарта.

Амерыканец жыў у Брэсце і працаваў там рэпетытарам ангельскай мовы для дзяцей, потым адкрыў рэстаран амерыканскай кухні Route 66.

Ньюман з’яўляецца прыхільнікам прэзідэнта Дональда Трампа. Зімой 2025 году Трамп памілаваў яго разам з іншымі ўдзельнікамі штурму Капітолія. Нейкі час пасля гэтага амерыканец заставаўся ў Брэсце.

Паводле дадзеных “Свабоды”, рэстаран Ньюмана ўжо закрыўся, у цэнтры вывучэння англійскай мовы ён таксама больш не выкладае.