Беларуса, які вярнуўся з-за мяжы аднавіць дакументы, абвінавацілі ў абразе міліцыянтаў
Затрыманы ўраджэнец Брэстчыны / УУС Мінаблвыканкама
Міліцыянты Мінскай вобласці затрымалі беларуса, які вярнуўся з-за мяжы, паведамляе прэс-служба УУС Мінскага аблвыканкама.
Гаворка ідзе пра 39-гадовага ўраджэнца Брэсцкай вобласці. Паводле міліцыянтаў, у сярэдзіне 2025 года ён выехаў за мяжу на заробкі. За мяжой ён пакідаў каментары ў адным з інфармацыйных каналаў — як называюць у міліцыі, "у канале экстрэмісцкай накіраванасці". Мяркуючы па словах міліцыянтаў, мужчына няўхвальна ацэньваў дзейнасць супрацоўнікаў МУС.
Сёлета ён вярнуўся ў Беларусь, каб аднавіць згубленыя дакументы — і яго затрымалі.
"У цяперашні час праводзяцца мерапрыемствы па ўсталяванні іншых фактаў пратэстнай дзейнасці затрыманага, следчымі пачатая крымінальная справа за публічную абразу прадстаўніка ўлады ў сувязі з выкананнем службовых абавязкаў", — заяўляюць у міліцыі.
