У аўторак у Беларусі чакаюцца дажджы, па ўсходзе краіны — моцныя

У аўторак, 28 ліпеня, у Беларусі ўначы будзе воблачна з праясненнямі, удзень чакаецца пераменная воблачнасць, паведамляе Белгідрамет.

На большай частцы тэрыторыі пройдуць дажджы, уначы ў асобных раёнах па ўсходняй палове — моцныя. Месцамі прагрымяць навальніцы. Вецер будзе заходні ўмераны, удзень — парывісты, у асобных раёнах — моцны парывісты, да 15-18 метраў за секунду.

Тэрмометры ўначы пакажуць ад +9 градусаў па захадзе да +16 па ўсходзе. Удзень чакаецца 17-23 градусы вышэй за нуль.

У сераду, 29 ліпеня, будзе воблачна з праясненнямі. Месцамі па краіне пройдуць кароткачасовыя дажджы, удзень у асобных раёнах магчымыя навальніцы. Вецер будзе паўночна-заходні, заходні ўмераны да парывістага, зранку і ўдзень месцамі, пераважна на ўсходзе, — моцны парывісты. Уначы прагназуецца 7-13 градусаў за знакам "плюс", удзень паветра прагрэецца да 19-26 градусаў цяпла.