Для беларускіх падлеткаў плануецца запуск гульні для прафарыентацыі

Прадстаўніца па эканоміцы і фінансах Аб’яднанага пераходнага кабінета Аліса Рыжычэнка абвясціла пра планы стварэння "гібрыднай гульні для падлеткаў, праз якую яны змогуць атрымліваць прафарыентацыю". Сэрвіс будзе бясплатным. Пра гэта яна распавяла ў першы дзень V Канферэнцыі беларусаў і беларусак свету.

Адказваючы на пытанне з залы пра сваю анлайн-школу, Рыжычэнка паведаміла, што "калі мы атрымаем падтрымку, то будзем пашыраць колькасць курсаў, развіваць розныя напрамкі, а таксама ствараць магчымасці для мужчын, каб яны маглі навучацца".

Цяпер "праграма не арыентавана на дзяцей, паколькі гэта іншы ўзровень".

"Аднак зараз мы плануем працаваць над стварэннем гібрыднай гульні для падлеткаў, праз якую яны змогуць атрымліваць прафарыентацыю. Гэта нашы бліжэйшыя планы. Гэтая магчымасць таксама будзе бясплатнай для беларускіх падлеткаў", — запэўніла Аліса Рыжычэнка.

Нагадаем, што ў канцы 2025 года яна абвясціла пра пачатак прыёму заявак у бясплатную анлайн-школу для беларусак з уразлівых груп, каб дапамагчы ім атрымаць сучасныя навыкі, устойлівасць і новыя прафесійныя магчымасці.