Што стаіць за “пакаяльным відэа” беларускага добраахвотніка “Лахвіча”

У акаўнтах беларускага добраахвотніка, былога байца батальёна “Волат” Палка Каліноўскага Аляксандра “Лахвіча” Наўковіча выйшла дзіўнае відэа. У каментах падазраюць, што яно знята пад прымусам, бо занадта падобна на “пакаяльнае”.

У кадры цалкам паголены добраахвотнік (раней у яго была доўгая барада і валасы) называе сябе “свінапасам” і выбачаецца за нейкія словы.

“Вусы — гэта адзнака шляхты, а я сваімі ўчынкамі паказаў, што я звычайны свінапас”, — кажа ў відэа “Лахвіч”.

Каментатары ўпэўнены, што ролік зняты пад прымусам.

“Пздц, звярніцеся да праваахоўных органаў Украіны. Гэта жудасна, калі беларусы робяць так з беларусамі”, — піша адзін з юзераў. Ён пытаецца: “Кадыраўшчына?” Былы добраахвотнік батальёна "Волат" палка Каліноўскага Аляксандр “Кусь” Клачко аб’явіў, што шукае аўтараў відэа.

“Шукаю мразот, якія датычны да здымак гэтага роліка. Гонар і годнасць гэтыя жывёлы маюць не большы чым отпрыскі кадырава”, — піша Клачко (арфаграфія і пунктуацыя аўтара).

Што адбылося?

У каментары Еўрарадыё “Кусь” распавядае, што “гэта зрабілі Батулін і Ваўкалак”. 

Гаворка ідзе пра Радзівона “Гену” Батуліна — камандзіра Беларускага добраахвотніцкага корпуса і Дзяніса “Ваўкалака” Урбановіча — іншага беларускага добраахвотніка ва Украіне.

Паводле Клачко, Батулін неаднаразова дазваляў сабе абразы ў бок іншых пабрацімаў — самога Клачко, “Лахвіча”, “Жэрара”, “Севера” ды іншых.

— “Лахвіч” доўгі час цярпеў гэта і маўчаў у адказ. Адзін раз выказаўся ў абарону свайго пабраціма “Жэрара”, які на сённяшні дзень знаходзіцца ў СІЗА Харкава па сфабрыкаваным абвінавачванні ў СПЧ (самавольным пакіданні часці), хаця там крыецца глыбока схаваная праблема карупцыі, у тым ліку з боку, які выставіў абвінавачванне.

Клачко кажа, што абразы ў бок “Лахвіча” толькі ўзмацніліся пасля абароны ім “Жэрара”. Таму Наўковіч “не вытрымаў” і запісаў відэазварот [у Instagram сторыз ужо недаступна — рэд.] у адказ на абразы Батуліна.

— Тое, што вы бачыце на відэа, — гэта губазаўскія метады, якія выкарысталі Батулін і “Ваўкалак” у дачыненні да “Лахвіча” толькі за тое, што ён не захацеў цярпець ад іх бясконцыя абразы ў свой бок, — кажа “Кусь”. — “Лахвіча” паставілі перад выбарам лепшым і лягчэйшым — для сябе ён абраў пагаліць твар і галаву і запісаць пакаяльнае відэа.

Клачко кажа, што Наўковіч цяпер запужаны. Ён “не мае прэтэнзій да бандытаў”, але добраахвотнік лічыць, што іх дзеянні трапляюць пад крымінальную адказнасць: напрыклад, як незаконнае пазбаўленне волі альбо выкраданне чалавека, альбо вымагальніцтва і прымус.