У дзень трагедыі на Нямізе ў Мінску зладзяць забаўляльны канцэрт у тым жа месцы

30 траўня ў Мінску стартуе гарадскі праект "Настрой — лета". Ён пачнецца велазаездам, а ўвечары адбудзецца афіцыйнае адкрыццё фэсту і бясплатны канцэрт каля Палаца спорту.

У гэтым жа месцы і таксама 30 траўня, але ў 1999 годзе падчас канцэрта адбылася трагедыя ў падземным пераходзе на Нямізе, калі загінулі 53 чалавекі. Мемарыял ім стаіць каля станцыі метро.

Выбарам даты і месца для новага канцэрта абурыліся ў сацсетках некаторыя беларусы, заўважыла выданне "Зеркало".

"А мы праігнаруем той факт, што 30 траўня на Нямізе будзе велазаезд, канцэрт і ўсе гэтыя розныя забаўлялаўкі? Усё б нічога, але 30 траўня — дзень трагедыі на Нямізе. Як па мне, поўны адстой рабіць нейкія канцэрты ў такую дату ў такім месцы", — напісала ў Threads адна з карыстальніц. Менш як за суткі яе пост сабраў 40 тысяч праглядаў і больш за тысячу лайкаў з сотняй каментароў.

"Дождж хоць бы не перадаюць? Не разумею, як пра гэта можна забыцца. Перыядычна, калі праходжу міма ружачак, з жахам гляджу ў гэты пераход і не магу паверыць, што ў ім такой жудаснай смерцю гінулі зусім маладыя людзі... Не тэракт, не вайна — проста з нічога такая трагедыя", — гаворыцца ў адным з каментароў.

Дарэчы, Белгідрамет сапраўды прагназуе на суботу на большай частцы краіны кароткачасовыя дажджы, удзень месцамі магчымыя навальніцы.