Фестываль "Браслаўскія зарніцы" сёлета ўсё ж адбудзецца

Браслаўскія чыноўнікі абвяргаюць паведамленне пра адмену міжнароднага фестывалю "Браслаўскія зарніцы".

Паведамленне пра адмену фэсту з'явілася пасля публікацыі пастановы Браслаўскага райвыканкама на Нацыянальным прававым партале пра адмену ранейшага рашэння. Аднак чыноўнікі запэўніваюць, што фестываль адбудзецца ў запланаваныя даты — з 22 па 24 траўня.

Загадчыца сектара культуры райвыканкама Людміла Новікава паведаміла ў раённым тэлеграм-канале, што ранейшае рашэнне адмянілі ў сувязі "са змяненнем нарматыўных прававых актаў і ўмоваў правядзення фестывалю". Што канкрэтна зменіцца, чыноўніца не ўдакладніла. Магчыма, змены закрануць міжнародны статус фестывалю, мяркуюць у "Віцебскай Вясне".

"Браслаўскія зарніцы" — найстарэйшае ў Беларусі свята традыцыйнай культуры. Упершыню фэст прайшоў у 1967 годзе, а ў 2009-м атрымаў статус міжнароднага. На яго прыязджалі танцоры, музыкі, выканаўцы песень з розных рэгіёнаў Беларусі, Расіі, Украіны, Літвы, Латвіі, Польшчы, Эстоніі.