Гаага, трыбунал і 3 тысячы еўра: НАУ ўзмацняе кампанію супраць уладаў Беларусі

Прадстаўнікі Народнага антыкрызіснага ўпраўлення на мінулым тыдні наведалі Гаагу ў межах кампаніі па прыцягненні ўладаў Беларусі да адказнасці за злачынствы супраць чалавечнасці. Пра гэта паведаміў кіраўнік арганізацыі Павел Латушка.

Паводле яго слоў, працэс у справе расследавання сітуацыі ў Беларусі працягваецца: “Усё рухаецца… Праца ідзе”.

У бліжэйшыя месяцы НАУ плануе правесці ў Гаазе, дзе знаходзіцца Міжнародны крымінальны суд (МКС), спецыяльнае мерапрыемства з удзелам прадстаўнікоў дзяржаў — удзельніц МКС. Мэта — прапанаваць далучыцца да расследавання сітуацыі ў Беларусі.

Латушка адзначыў, што адной з краін ужо дадзена згода на арганізацыйную дапамогу, аднак НАУ не хапае фінансавання для правядзення мерапрыемства. Арганізацыя заклікае беларусаў падтрымаць ініцыятыву ахвяраваннямі. Неабходная сума — каля 3 тыс. еўра.

Нагадаем, у сакавіку МКС распачаў расследаванне па матэрыялах Літвы адносна магчымых трансгранічных злачынстваў супраць чалавечнасці, у якіх фігуруе беларускае кіраўніцтва. Офіс пракурора МКС адзначыў, што ёсць падставы меркаваць пра здзяйсненне такіх дзеянняў часткова на тэрыторыі Літвы.

Паралельна працягваецца праца па стварэнні спецыяльнага трыбунала па злачынстве агрэсіі супраць Украіны. У 2025 годзе шэраг краін і Савет Еўропы падтрымалі адпаведныя рашэнні і пагадненні, а Украіна і яе партнёры афіцыйна аформілі дамоўленасці аб яго стварэнні.

Раней у еўрапейскіх інстытуцыях абмяркоўвалася магчымасць пашырэння юрысдыкцыі будучага трыбунала і на дзеянні беларускага кіраўніцтва, а таксама пытанні адказнасці за дэпартацыю ўкраінскіх дзяцей з акупаваных тэрыторый.