Індыйскае войска атрымала на ўзбраенне дроны-камікадзэ беларускай распрацоўкі
Дрон "Міратворац" паказваюць Лукашэнку / president.gov.by
Індыйскае войска атрымала першую партыю дронаў-камікадзэ "Міратворац" беларускай распрацоўкі. Беспілотнік атрымаў у Індыі назву Agniveg ("Агнівег") і падаецца як прыклад айчыннай зброі. На ўзбраенне паступіла больш за сотню БПЛА.
Аднак фактычна беспілотнік "Агнівег" — гэта перайменаваны беларускі "Міратворац", піша "Наша Ніва". Дрон, здольны развіваць хуткасць да 450 кіламетраў за гадзіну і прызначаны для ўдараў па важных аб'ектах праціўніка, распрацавала канструктарскае бюро "Індэла". У Індыі беларускае паходжанне беспілотнікаў не згадваюць — яно вынікае толькі з інфармацыі крыніц у абаронных структурах.
Кампанія "Індэла" (ці ААТ "Беспілотныя верталёты") і яе галоўны канструктар Уладзімір Чудакоў цяпер знаходзяцца пад санкцыямі шэрагу краін, у тым ліку Еўрасаюза.
