У Віцебскай вобласці ўпаў другі беспілотнік за тыдзень
Дрон, ілюстрацыйнае фота / kommersant.ru
23 траўня каля вёскі Янава Сенненскага раёна ўпаў БПЛА. Пры падзенні дрон пашкодзіў лінію электраперадач, паведамляе "Віцебская Вясна".
Мясцовыя жыхары выклікалі на месца здарэння аварыйныя службы і міліцыю. Абломкі беспілотніка адразу забралі прадстаўнікі ўлады, а людзям забаранілі расказваць пра здарэнне.
Афіцыйных каментароў з нагоды здарэння не было, таму сярод вяскоўцаў ходзяць розныя чуткі. Некаторыя кажуць, быццам на беспілотніку была выбухоўка, якая не спрацавала. Таксама расказваюць, нібыта на дроне былі дзіркі — як быццам па ім стралялі. Таксама гучала версія, што гэта заблукаў адзін з расійскіх беспілотнікаў, якімі ўначы 23 траўня атакавалі тэрыторыю Украіны.
Папярэдняе паведамленне пра дрон, які ўпаў на Віцебшчыне, было з Глыбоцкага раёна. Там здарэнне адбылося 17 траўня.
