Літоўцы затрымалі на мяжы паляка з лесвіцай і вялікай сумай грошай, які ішоў у Беларусь
Паляк, які спрабаваў трапіць з Літвы ў Беларусь / VSAT
Літоўскія памежнікі затрымалі 44-гадовага грамадзяніна Польшчы прыкладна за 200 метраў ад мяжы з Беларуссю.
Як паведамляе прэс-служба літоўскіх памежнікаў, мужчына нёс самаробную лесвіцу. Ён планаваў з яе дапамогай перабрацца праз фізічны бар'ер на мяжы і трапіць у Беларусь. Пры сабе паляк меў грошы ў доларах ЗША і польскіх злотых. Агульная сума складае амаль 60 тысяч еўра ў эквіваленце.
Таксама памежнікі знайшлі ровар замежніка, сумкі, спальны мяшок і асабістыя рэчы. Пры сабе мужчына меў малаток, нажы, цвікі.
Затрыманага ўзялі пад варту. Супраць яго пачалі расследаванне па факце спробы незаконнага перасячэння дзяржаўнай мяжы і перавозкі кантрабанды (грошай). Суд прызначыў меру стрымання — арышт на адзін месяц. Агулам жа паляку можа пагражаць да васьмі гадоў пазбаўлення волі.
