МЗС Беларусі вінаваціць Літву ў залёце ўкраінскага беспілотніка
МЗС Беларусі / sb.by
Беларускае МЗС вінаваціць Літву ў тым, што з яе тэрыторыі ў Беларусь заляцеў… украінскі беспілотнік. Інцыдэнт, як паведамляецца, здарыўся 17 траўня. Праз гэта наша краіна заявіла Літве "рашучы пратэст".
У Мінску лічаць, што Літва нічога не зрабіла, каб не дапусіць дрон у Беларусь. Больш за тое — яна не папярэдзіла пра яго ўзброеныя сілы. Здарэнне называюць прамой пагрозай бяспецы Беларусі і парушэннем нормаў міжнароднага права.
У сваю чаргу Літва вінаваціць Беларусь і Расію ў эскалацыі. У сераду, 20 траўня, жыхарам Вільні і памежных раёнаў давялося спускацца ў бамбасховішчы праз беспілотнік, які заляцеў у краіну з тэрыторыі Беларусі. Праўда, беларускі бок пра гэта Літву папярэдзіў.
У чацвер ва Уцянскім раёне Літвы зноў абвяшчалі паветраную трывогу — праз чарговае з'яўленнне дронаў на тэрыторыі краіны.
