На аўкцыён выставілі старыя абразы, арыштаваныя ў ксяндза-палітвязня
Улады прадаюць абразы, канфіскаваныя ў ксяндза-палітвязня / e-auction.by
На аўкцыён выставілі два старыя абразы, якія дзяржава канфіскавала ў ксяндза Генрыха Акалатовіча — былога палітвязня, вызваленага ў лістападзе 2025 года і вывезенага ў Рым. Як заўважыла "Хрысціянская візія", абодва абразы вывезлі ў Нацыянальны мастацкі музей у Мінску.
На аўкцыён выставілі абраз ХІХ — пачатку ХХ стагоддзя "Свяціцель Іуліян, біскуп Кенаманійскі". У апісанні гаворыцца, што такі сюжэт сустракаецца рэдка і ўяўляе гістарычную цікавасць як аб'ект культурнай спадчыны. Пачатковая цана лота — 700 рублёў.
Другі абраз — "Узняццё Хрыста з труны", ён датуецца другой паловай — канцом XVIII ст. Пачатковы кошт лота — 4000 рублёў.
Таргі па абодвух абразах прызначаныя на 14 траўня.
Раней суд пастанавіў канфіскаваць маёмасць Акалатовіча — нібыта для "пагашэння даўгоў". Улады ўжо здолелі прадаць аўтамабіль ксяндза-палітвязня, а вось на зямельны ўчастак пакупнікоў пакуль не знайшлі.
