На чале яшчэ аднаго мінскага тэатра стаў рэжысёр з Расіі
Юрый Папоў / bnkomi.ru
Мастацкім кіраўніком мінскага Новага драматычнага тэатра стаў расійскі рэжысёр Юрый Папоў, заўважыла выданне "Зеркало".
Папову 53 гады, ён працаваў у расійскіх правінцыйных калектывах. Дастаткова нядаўна ён пераехаў з сям'ёй у Беларусь. Стаў выкладаць у Акадэміі мастацтваў і паставіў у Камерным драматычным тэатры (гэта прыватны праект Наталлі Башавай) спектакль "Кругі на вадзе". Спектакль пад такой жа назвай ён ставіў у расійскім горадзе Северску ў Томскай вобласці.
Наталля Башава ў лютым 2026-га стала дырэктаркай Новага драматычнага тэатра. Пры канцы красавіка яна паставіла тут свой першы спектакль — "Маладая гвардыя" па матывах аднайменнага савецкага твора. Цяпер Башава запрасіла Папова працаваць у гэтым жа тэатры.
Першым яго спектаклем у новым статусе стала пастаноўка паводле твора рускай літаратуры — "Дзівакі" Васіля Шукшына.
Апошнім часам расійскія рэжысёры ўсё часцей займаюць кіруючыя пасады ў беларускіх тэатрах. Мастацкім кіраўніком Опернага ў 2025-м стаў расіянін Арцём Макараў, у Купалаўскім у 2026-м на такую ж пасаду прызначылі расіяніна Дзмітрыя Акімава.
