На мяжы Украіны правядуць маштабныя вучэнні з "умоўнымі ракетнымі ўдарамі"
У Хойніках рыхтуюцца да маштабных вучэнняў / hoiniki.by
Маштабныя вучэнні рыхтуюцца ў Хойніцкім раёне Гомельшчыны, які мяжуе з Украінай. Як паведаміла дзяржаўная раённая газета, заўважыў сайт "Флагшток", тут плануецца правесці комплекснае вучэнне з раённым звяном Гомельскай тэрытарыяльнай падсістэмы ДСНС (дзяржаўнай сістэмы папярэджання і ліквідацыі надзвычайных сітуацый) і грамадзянскай абароны.
Дата вучэння і канкрэтнае месца правядзення не ўдакладняюцца. У раёнцы паведамілі, што напярэдадні вучэнняў у Хойніках сабралі кіраўнікоў арганізацый і профільных спецыялістаў, адказных за пытанні грамадзянскай абароны і абароны насельніцтва ў надзвычайных сітуацыях. Галоўнай мэтай вучэнняў назвалі "арганізаванае і аператыўнае рэагаванне ўсіх службаў на магчымыя надзвычайныя сітуацыі любога характару".
У публікацыі таксама адзначаецца, што сцэнар вучэнняў прадугледжвае дзеянні не толькі пры падтапленні населеных пунктаў і аварыях на камунальных сетках, але і пры "ўмоўных ракетных ударах з масавай колькасцю пацярпелых".
Асаблівую ўвагу на нарадзе, як паведамляецца, надавалі "ўдасканаленню сістэмы апавяшчэння і комплексу мер па абароне насельніцтва".
