У Беларусі зафіксавалі самы хуткі рост цэн на паслугі за апошнія 14 месяцаў
Цэны растуць
У красавіку 2026 года паслугі ў Беларусі падаражэлі ў сярэднім на 2,78%. Гэта самы высокі месячны рост за апошнія 14 месяцаў, пра што сведчыць аналіз даных Белстата.
Пры гэтым паслугі даражэюць ужо шосты месяц запар. Для параўнання: у сакавіку рост склаў 1,16%, у лютым — 0,74%, а ў студзені — 0,63%.
Асноўнай прычынай рэзкага падаражання стала павышэнне тарыфаў на жыллёва-камунальныя паслугі. У красавіку кошт ЖКГ вырас на 10,23%.
Звычайна тарыфы на камунальныя паслугі павышаюцца ў лютым, аднак у гэтым годзе іх індэксацыю перанеслі на красавік. Улады тлумачылі такое рашэнне халоднай зімой і жаданнем знізіць фінансавую нагрузку на насельніцтва.
