Пастаўкі беларускага бензіну на Пецярбургскай біржы выраслі ў 26 разоў
На беларускай запраўцы / sb.by
У маі на Санкт-Пецярбургскай міжнароднай таварна-сыравіннай біржы было рэалізавана 23,64 тыс. тон беларускага бензіну. Гэта ў 26 разоў больш, чым за аналагічны месяц 2025 года, калі аб’ём склаў усяго 0,9 тыс. тон. Даныя прыводзіць Нацыянальнае біржавае агенцтва са спасылкай на ТАСС.
У параўнанні з красавіком бягучага года продажы выраслі на 16,6%, або на 3,36 тыс. тон. Значны рост таксама зафіксаваны па дызельным паліве з Беларусі. Яго рэалізацыя павялічылася ў тры разы і дасягнула 49,86 тыс. тон, а ў параўнанні з красавіком — у 3,3 раза.
Эксперты звязваюць рост паставак з павышаным попытам на імпартнае паліва на расійскім рынку. Дадатковым фактарам называюць сезоннае павелічэнне спажывання і перабоі на фоне атак на расійскія нафтаперапрацоўчыя заводы. Улады Расіі ужо абмяркоўваюць магчымасць пашырэння паставак паліва з Беларусі для стабілізацыі ўнутранага рынку.
