Офісы, казіно, крамы. У што хочуць ператварыць былую друкарню на плошчы Якуба Коласа

У Мінску пачынаецца грамадскае абмеркаванне праекта рэканструкцыі будынка былой друкарні на плошчы Якуба Коласа. Яна размяшчаецца на вуліцы Чырвонай, 23, аб’ект плануюць ператварыць у шматфункцыянальны цэнтр, захаваўшы яго гістарычнае аблічча.

Гараджан запрашаюць абмеркаваць рэканструкцыю. Свае думкі і пажаданні можна дасылаць у перыяд з 30 красавіка па 14 траўня 2026 года.

Азнаёміцца з новым праектам можна ў фае адміністрацыі Савецкага раёна (вул. Дарашэвіча, 8) і на сайце адміністрацыі ў раздзеле "Грамадскія абмеркаванні".

Прэзентацыя праекта адбудзецца 5 траўня з 10:00 да 11:00 у актавай зале гасцініцы Crowne Plaza (вул. Кірава, 13).

Свае прапановы можна дасылаць па адрасе:

220013, г. Мінск, вул. Дарашэвіча, 8

або на e-mail: [email protected]

Інвестарам рэканструкцыі выступае "Прынцэс Плаза Цэнтр". У абноўленым аб’екце плануецца размясціць офісы, крамы, фітнес-клуб, аддзяленне банка, кавярні і казіно на 100 наведвальнікаў.

Праектам прадугледжаны падземны паркінг на 445 машын.

Агульная плошча офісаў складзе каля 7800 м², гандлёвых памяшканняў — каля 4400 м².

Будынак быў пабудаваны ў 1956 годзе ў стылі сталінскага ампіру і доўгія гады служыў галоўным корпусам Мінскага паліграфічнага камбіната імя Якуба Коласа.

Пасля пераносу вытворчасці на пачатку 2010-х ён пуставаў. Спроба ператварыць яго ў пяцізоркавы гатэль у 2012 годзе не была рэалізаваная.