Пачобут быў афіцыйна памілаваны, хаця і не пісаў прашэнне

Анджэй Пачобут атрымаў афіцыйнае памілаванне, хаця і не пісаў адпаведнае прашэнне. Пра гэта экс-палітвязень расказаў у інтэрв'ю польскай радыёстанцыі RMF24.

Пра факт памілавання яму сказалі перад вызваленнем. Паводле Пачобута, прадстаўнікі спецслужбаў запісалі на відэа момант, калі яму зачытваюць указ Аляксандра Лукашэнкі.

Перад высылкай у Польшчу Пачобуту вярнулі беларускі пашпарт — многім з высланых палітвязняў дакументы не аддавалі.

У гутарцы з польскімі журналістамі Анджэй пацвердзіў, што хоча вярнуцца ў Беларусь, бо фармальна прычынаў для яго арышту няма. Гэта яму абяцалі і прадстаўнікі рэжыму, якія вывозілі экс-палітвязня: "Калі мяне вывозілі за мяжу, яны сказалі, што, паводле дамовы, я магу ўвайсці на тэрыторыю Польшчы, а потым адразу праз любы іншы памежны пераход вярнуцца ў Беларусь".

Пачобут кажа, што ў Беларусі ён намераны зноў удзельнічаць у працы неафіцыйнага Саюза палякаў, у тым ліку займацца развіццём польскамоўнай адукацыі.