Пачынаецца галасаванне ў Каардынацыйную раду 4-га склікання. Сайт знаходзіцца пад атакай

11 траўня 2026 года а 22.00 па мінскім часе павінна было пачацца галасаванне на выбарах у Каардынацыйную раду 4-га склікання. Яно працягнецца да 17 траўня 2026 года ўключна. 

Яшчэ да пачатку галасавання сэрвісы апынуліся пад масіраванай атакай, паведаміла тэхнічная каманда Паўла Лібера. Сайт і мабільная аплікацыя яшчэ тэстуюцца.

У КР ідуць дзевяць блокаў. Тут можна вывучыць іх праграмы і зрабіць свой выбар.

Для ўдзелу ў галасаванні трэба пацвердзіць сваю асобу. Зрабіць гэта можна па сінім пашпарце Беларусі або па чырвоным пашпарце Новай Беларусі.

Як прагаласаваць

Ёсць два спосабы, выбар канкрэтнага залежыць ад месцазнаходжання беларуса.

Тым, хто знаходзіцца за мяжой, рэкамендуецца карыстацца мабільным дадаткам, яго назва будзе адрознівацца ад ранейшай — Belarus ID.

Тым, хто жыве ў Беларусі, варта скарыстацца вэб-версіяй сэрвісу праз браўзер. Гэта будзе бяспечней, паколькі мабільны дадатак складана выдаліць без слядоў пасля ўстаноўкі.

Сэрвіс будзе выкарыстоўваць спецыяльную спасылку, якая не пакідае гісторыі наведванняў у правайдара.

Механізм галасавання

Трэба зайсці ў мабільны дадатак або на вэб-платформу Belarus ID і пацвердзіць сваю асобу.

Можна выкарыстоўваць сіні беларускі пашпарт (праз сістэму KYC ад правайдара Sumsub) або новы нацыянальны пашпарт Беларусі (праз партал Belarus-passport.com).

Пасля пацвярджэння асобы сістэма створыць ваш лічбавы ID. Нават калі вы праходзілі верыфікацыю два гады таму, яе трэба будзе прайсці нанова праз змену платформы.

Далей — непасрэдна выбары: неабходна будзе выбраць адзін са спісаў кандыдатаў, націснуць “Прагаласаваць” і пацвердзіць сваё канчатковае рашэнне.

Захавайце код вашага голасу. Гэта дазволіць пазней праверыць праз незалежную блокчэйн-платформу vocdoni, ці быў ваш голас улічаны правільна.

Пасля гэтага застанецца толькі дачакацца вынікаў галасавання.

Што за скандал з правайдарам Sumsub? Ці бяспечны ён?

10 мая “Наша Ніва” апублікавала матэрыял, у якім паставіла пад сумнеў рэпутацыю правайдара Sumsub. Там была інфармацыя пра факт уцечкі некаторых даных, які кампанія прызнала ў лютым 2026 года. І пра заснавальнікаў, якія нарадзіліся ў Расіі.

На думку Паўла Лібера, каманда якога адказвае за тэхнічны бок галасавання і бяспеку, Sumsub усё ж мае больш сур’ёзную рэпутацыю, чым гэта прадстаўлена ў матэрыяле “Нашай Нівы”.

Sumsub цесна супрацоўнічае з Інтэрпалам у праектах па барацьбе з AI-махлярствам. А сярод яе кліентаў — не толькі крыптабіржы, але і глабальныя кампаніі, такія як Vodafone, Avis і Duolingo.

Пасля пазачарговага пасяджэння выбарчай камісіі 10 мая, дзе выступілі Павел Лібер і іншыя яе члены, было вырашана дадаткова праверыць сістэму бяспекі і звярнуцца па дадатковыя тлумачэнні ў кампанію Sumsub.

Увечары 11 траўня на “Нашай Ніве” выйшла навіна, у якой апублікаваны адказ Sumsub на артыкул ад 10 мая. Кампанія заявіла пра фактычныя памылкі там, а ўцечка 2024 года была раскрытая самой кампаніяй. Sumsub адмаўляе сувязі з уладамі Расіі і патрабуе выправіць ілжывую інфармацыю.