Пакуль невядома, калі платформа для галасавання ў КР пачне працаваць — Брухан
Арцём Брухан / Еўрарадыё
Пакуль невядома, калі платформа для галасавання ў Каардынацыйную раду чацвёртага склікання пачне працаваць. Пра гэта Еўрарадыё расказаў спікер Каардынацыйнай Рады Арцём Брухан.
"З улікам таго, што адбываецца моцная атака на платформу для галасавання КР, адбываецца дадатковае тэставанне, каб забяспечыць працу гэтай платформы. Пакуль яшчэ невядома, колькі часу гэта зойме.
Але я думаю, што выбарчая камісія можа прапанаваць КР прыняць рашэнне пра працяг тэрміну галасавання на суткі, і я спадзяюся, што КР прагаласуе за гэтае рашэнне, каб выбары адбываліся цягам 7 дзён".
Галасаванне на выбарах у КР мусіла стартаваць у 00:00 панядзелка, але было перанесенае на 22 гадзіны дзеля дадатковай праверкі тэхнічнага правайдера. Аднак і ўвечары 11 траўня платформа, праз якую можна аддаць свой голас, не пачала працу праз маштабную DDOS-атаку: больш за мільярд запытаў.
