Памежная служба Украіны расказала пра сітуацыю на мяжы з Беларуссю
Украінскія памежнікі, ілюстрацыйнае фота / RFE/RL
На тэрыторыі Беларусі каля ўкраінскай мяжы не назіраецца нарошчвання вайсковых сілаў. Пра гэта ў каментары Радыё Свабода расказаў спікер Памежнай службы Украіны Андрэй Дземчанка.
Паводле яго, Беларусь яшчэ з 2022 года трымае ў памежных раёназ невялікую колькасць падраздзяленняў і перыядычна праводзіць ратацыю, але не павялічвае іх колькасць.
Дземчанка звярнуў увагу, што больш небяспечныя працэсы адбываюцца ў глыбіні тэрыторыі. Паводле звестак украінскай разведкі, Крэмль цяпер больш актыўна цісне на Мінск, каб Беларусь больш маштабна далучылася да вайны супраць Украіны. "Гэта значыць, у далейшым могуць быць і правакацыі ў кірунку нашай мяжы. Нельга выключаць і ўварванне", — адзначыў ён.
Разам з тым украінскі памежнік канстатуе, што ўдарных расійскіх груповак на тэрыторыі Беларусі няма. Праўда, ён не выключае, што РФ можа ў любы момант іх перакінуць і выкарыстоўваць інфраструктурныя аб'екты, якія будуе Беларусь.
Апошнім часам Украіна не аднойчы заяўляла, што Расія імкнецца выкарыстоўваць тэрыторыю Беларусі для пашырэння вайны.
