Украіна ўзмоцніць паўночны кірунак на фоне пагрозы з тэрыторыі Беларусі
Уладзімір Зяленскі / Telegram / Zelenskiy Official
Украіна ўзмоцніць Чарнігаўска-Кіеўскі кірунак на фоне пагрозы з тэрыторыі Беларусі. Такое рашэнне прыняў прэзідэнт Уладзімір Зяленскі на пасяджэнні ваеннай стаўкі 20 траўня.
Як паведамляе яго прэс-служба, Зяленскі заявіў: "Нашыя сілы на кірунку будуць павялічаныя".
Акрамя таго, украінскі прэзідэнт даручыў МЗС "падрыхтаваць дадатковыя мерапрыемствы па дыпламатычным уплыве ў дачыненні да Беларусі". На яго думку, Крэмль можа выкарыстоўваць Беларусь для пашырэння вайны. "Ёсць адпаведныя непублічныя задачы для ўкраінскіх разведвальных службаў", — адзначае прэс-служба Зяленскага.
Апошнім часам украінскае кіраўніцтва неаднаразова адзначала падазроную актыўнасць на тэрыторыі Беларусі. Галоўнакамандуючы УСУ Аляксандр Сырскі ў сваім інтэрв'ю 19 траўня назваў рэальнай расійскую вайсковую аперацыю з тэрыторыі Беларусі.
