Перад візітам Ціханоўскай у Арменіі затрымалі і вызвалілі беларускага палітуцекача

Беларускага палітуцекача, які прыбыў наземным шляхам з Грузіі, затрымалі на мяжы ў Арменіі ў адпаведнасці з запытам з Мінска. Гэта адбылося ў другой палове дня 3 траўня, напярэдадні візіту Святланы Ціханоўскай.

Да вырашэння праблемы падключыліся армянскія праваабаронцы і офіс Святланы Ціханоўскай. У каментары выданню "Позірк" дарадца дэмакратычнай лідаркі па прававых пытаннях Леанід Марозаў сказаў, што ён звязаўся са службай нацыянальнай бяспекі Арменіі. Адтуль яго перанакіравалі ў памежныя войскі.

Беларуса вызвалілі прыкладна праз 12 гадзін пасля затрымання. Пэўны час ён застанецца ў Арменіі, пакуль мясцовыя ўлады выдадуць яму неабходныя дазволы на выезд.

Палітуцякач расказаў журналістам, што ў Беларусі на яго пачалі крымінальную справу. Сілавікі прыходзілі да маці, каб высветліць яго месцазнаходжанне, заявіўшы, быццам сын здзейсніў крадзеж.

У лютым 2026 года спікер армянскага парламента Ален Сіманян заявіў, што ні адзін чалавек з палітычных меркаванняў не будзе ні затрыманы, ні высланы ў якую-небудзь краіну.