Польшча скарачае фінансаванне сваёй меншасці ў Беларусі
Польшча скарачае фінансаванне СМІ сваёй меншасці, ілюстрацыйнае фота / Bankier.pl
Сенат Польшчы скараціў фінансаванне прэсы польскай меншасці за мяжой, заўважыла выданне MOST. Таксама скарацілася матэрыяльная дапамога для асоб у патрэбе і фінансаванне польскіх нацыянальных святаў.
Сродкі на СМІ для польскай меншасці ў Беларусі вылучаюцца ў рамках праграмы Senat-Polonia 2026. З іх фінансуецца дзейнасць партала Саюза палякаў Portalzpb.pl і часопіса Magazyn Polski, які выдаецца ўжо 30 гадоў. У канцы сакавіка дзеячы Саюза палякаў у Беларусі даведаліся, што сёлета датацыя на медыя зменшыцца ў чатыры разы ў параўнанні з мінулым годам.
Рэдактар Magazyna Polskiego Марэк Занеўскі кажа, што далейшае існаванне выдання знаходзіцца "пад пытаннем".
Старшыня неафіцыйнага Саюза палякаў Анжаліка Борыс звярнулася з лістом наконт фінансавання СМІ да прэм'ер-міністра Дональда Туска, міністра замежных спраў Радаслава Сікорскага і спікеркі Сената Малгажаты Кідава-Блоньскай. Борыс прапануе пачаць збор ахвяраванняў сярод палякаў у Беларусі і ў Польшчы.
Пра фінансавання СМІ гаварыў з польскім кіраўніцтвам і нядаўна вызвалены палітвязень Анджэй Пачобут, актывіст Саюза палякаў. Раней ён быў рэдактарам Magazyna Polskiego. Яму абяцалі разгледзець гэтае пытанне зноў.
