Праграма па пошуку "экстрэмізму" знайшла нацысцкую сімволіку на бляшанцы згушчонкі

Праграма па пошуку "экстрэмісцкага кантэнту" ў інтэрнэце знайшла нацысцкую сімволіку на бляшанцы рагачоўскай згушчонкі. Пра гэта піша Радыё Свабода, журналісты якога ўзяліся праверыць праграму, якую піяраць дзяржаўныя СМІ.

На пачатку траўня інфармагенцтва БЕЛТА паведаміла, што ў Беларусі распрацавалі праграмна-аналітычны комплекс "Іскра Ультра". Ён нібыта аналізуе кантэнт у інтэрнэце і вызначае, ці з'яўляецца той "экстрэмісцкім" з пункту гледжання ўладаў. Распрацоўшчыкам праграмы выступіў супрацоўнік выдання "Лоеўскі край", студэнт Гомельскага дзяржаўнага тэхнічнага ўніверсітэта Раман Нядбайла. Навінку назвалі паводле наймення моладзевага крыла праўладнай партыі "Белая Русь" — яно і называецца "Іскра". 24-гадовы Нядбайла ўзначальвае раённую філію гэтай структуры ў Лоеўскім раёне.

Як піша Радыё Свабода, яшчэ на этапе падлучэння праграмы з'явіўся надпіс пра тое, што яна часткова распрацаваная ў расійскім Сколкаве. А ў файлах праграмы бачна, што выкарыстоўваецца таксама сістэма распазнавання ад кітайскага DeepSeek.

Пры загрузцы ў праграму тэкстаў з "экстрэмісцкіх" рэсурсаў "Іскра Ультра" вызначыла кантэнт як бяспечны. Таксама праграма не пабачыла праблем у двух фатаздымках з бел-чырвона-белым сцягам. Нават фота з Ціханоўскай і бел-чырвона-белым сцягам не выклікала падазрэнняў у "Іскры Ультра".

Праблема ўзнікла, калі ў яе загрузілі фота бляшанкі рагачоўскай згушчонкі. Праграмна-аналітычны комплекс адразу ж прасігналіў, што тут "магчымая нацысцкая сімволіка". Тое самае адбылося з яшчэ некалькімі нейтральнымі карцінкамі з інтэрнэту, адзначае Свабода.