Пратасевіч выдаў за журналістку БРЦ дзяўчыну, якая ніколі там не працавала

У сваёй праграме пра Беларускі расследавальніцкі цэнтр Раман Пратасевіч проста ўзяў і прыдумаў адну з яго журналістак. У БРЦ ёсць супрацоўнік, які карыстаецца псеўданімам "Яна Міцкевіч". Прапагандысты з СТБ папросту адшукалі ў сацсетках дзяўчыну з такім жа імем і прозвішчам, узялі яе фота і дату нараджэння. І паказалі, быццам бы гэта і ёсць тая самая “Яна Міцкевіч” з БРЦ.

Сюжэт Пратасевіча выйшаў 2 красавіка, за дзень да прызнання Беларускага расследавальніцкага цэнтра “экстрэмісцкім фарміраваннем”. У ім пералічаны некалькі журналістаў, якія ў розны час супрацоўнічалі з БРЦ.

Але за “аўтарку і рэдактарку шматлікіх матэрыялаў” Яну Міцкевіч у ім выдалі іншага чалавека. Гэта Еўрарадыё пацвердзіў кіраўнік БРЦ Станіслаў Івашкевіч.

Сапраўдная Яна Міцкевіч, якая нарадзілася 21 жніўня 1988 года, ніколі не працавала ў БРЦ. Але дзяўчына скончыла журфак БДУ — магчыма, гэты факт і наштурхнуў прапагандыстаў на думку, што гэта тая самая Яна Міцкевіч.

У Еўрарадыё не атрымалася знайсці фота, скарыстанае ў сюжэце СТБ, у Фэйсбуку рэальнай Яны Міцкевіч. Яно старое і, хутчэй за ўсё, узятае яшчэ з “ВКонтакте”.

Мяркуючы па сацсетках дзяўчыны, яна цяпер жыве ў Швецыі — з’ехала з Беларусі каля 10 гадоў таму, і з таго часу журналістыкай не займаецца.