Расія хоча павялічыць закупкі беларускага бензіну
Расіі не хапае ўласнага аўтамабільнага паліва. / sb.by
На фоне ўкраінскіх удараў па расійскіх НПЗ урад РФ задумаўся пра павелічэнне закупак аўтамабільнага паліва з Беларусі. Як кажуць крыніцы РБК, расійскі віцэ-прэм’ер Аляксандр Новак даручыў профільным ведамствам правесці кансультацыі з афіцыйным Мінскам аб магчымасці паставак большага аб’ёму бензіну.
Таксама ўрад Расіі можа павялічыць выплаты па імпартным дэмпферы, у тым ліку на беларускае паліва. Імпартны дэмпфер выкарыстоўваецца, калі кампаніям выгадней прадаваць бензін або дызель у іншыя краіны, а не ў Расіі — па сутнасці, гэта механізм даплаты розніцы ў цане. Атрымліваецца, з такім механізмам беларускія НПЗ змогуць зарабляць больш за кошт расійскіх бюджэтных выплат.
Праз удары Украіны па расійскіх НПЗ некаторыя рэгіёны РФ ужо сутыкнуліся з дэфіцытам паліва. Напрыклад, у акупаваным Крыме бензін пачалі прадаваць па талонах, абмежаванні ўводзіліся і ў Маскве.
Мазырскі НПЗ і “Нафтан” могуць перапрацоўваць да 24 млн тон за год і вырабляць каля 4 млн тон бензіну за год. Каля паловы гэтага аб’ёму ідзе на ўнутраны рынак. А ў той жа Расіі спажываецца штомесяц 3 млн тон, гэта значыць беларускія НПЗ змогуць атрымаць прыкметны прыбытак толькі скараціўшы пастаўкі на ўнутраны рынак.
