Самалёт з Масквы не змог прызямліцца ў Гомелі праз дронавую небяспеку — "Флагшток"

Самалёт Embraer кампаніі "Белавія" 17 траўня не змог сесці ў гомельскім аэрапорце. Згодна з раскладам гэта мусіла адбыцца ў 16:20. Даляцеўшы да Беларусі, самалёт стаў кружыць у Магілёўскай вобласці каля Слаўгарада, дзе знаходзіўся каля 35 хвілін. Пасля гэтага рэйс адправіўся ў Мінск.

Па стане на раніцу 18 траўня ні "Белавія", ні "Белаэранавігацыя" (яе філіялам з'яўляецца Гомельскі аэрапорт) не патлумачылі прычыны інцыдэнту. Але іх даведалася выданне "Флагшток".

Паводле інфармацыі ад крыніцы, самалёт не змог сесці ў Гомелі праз дронавую небяспеку. Гэтую інфармацыю пацвердзілі і пасажыры рэйса. Адзін з іх напісаў у сацсетцы Threads: "Была атака дронаў, як нам патлумачылі".

Іншыя карыстальнікі паведамілі, што акурат тым часам над Гомелем пралятаў вайсковы самалёт.

Інцыдэнт з рэйсам "Белавія" адбыўся на пачатку чарговай атакі расійскіх беспілотнікаў па Украіне. Першыя расейскія дроны з'явіліся над Чарнігаўскай вобласцю, якая мяжуе з Гомельшчынай, у нядзелю ў 15:50.

Потым маніторынгавыя каналы паведамілі пра чатыры групы расійскіх беспілотнікаў у Чарнігаўскай вобласці. Аднак назіральнікі не зафіксавалі парушэння дронамі паветранай прасторы Беларусі.

Пасажыры гомельскага рэйса расказалі ў сацсетках, што ў мінску яны чакалі тры гадзіны, пасля чаго іх адправілі ў Гомель на аўтобусе.