Сапкоўскі прыйшоў на кніжны кірмаш у Беластоку — і пахваліў беларускі пераклад "Ведзьмара"
Анджэй Сапкоўскі падпісвае асобнік "Ведзьмара" / instagram.com/nasta_bellit
Аўтар "Ведзмара" Анджэй Сапкоўскі прыйшоў на кніжны кірмаш у Беластоку — і пахваліў беларускі пераклад сваёй сагі. "Я бачыў, што ў вас там літары на карэньчыках [кніжак] збіраюцца ў слова. Яшчэ не хапае, чакаем наступныя", — адзначыў ён, калі рэдактарка выдавецтва "Янушкевіч" Наста Карнацкая перадала кніжку яму на подпіс.
77-гадовы Сапкоўскі — адзін з самых папулярных польскіх пісьменнікаў у свеце. У чарзе па аўтограф да яго давялося чакаць больш за паўтары гадзіны!
Культавую серыю Сапкоўскага пачалі выдаваць па-беларуску ўвосень 2019 года. Усяго ў ёй 8 кніг, на гэты момант на беларускай мове выйшлі пяць.
Магчыма, "Янушкевіч" выдаў бы іх хутчэй. Але праз рэпрэсіі ў Беларусі выдавецтва вымушанае было зрабіць паўзу.
