У Дзмітрыя Баскава знайшлі яшчэ дзве кампаніі пад брэндам "Лепшы" (Lepshy)

Дзмітрый Баскаў, трэнер па хакеі Мікалая Лукашэнкі, развівае свой бізнес пад брэндам "Лепшы" (Lepshy). Расследвальнікі "Бюро" знайшлі яшчэ дзве кампаніі гэтага брэнду ў бізнесоўца, набліжанага да сям'і Лукашэнкі.

Як паведамлялася раней, у верасні 2022 года пачаўся выпуск бомбераў пад брэндам Lepshy, якімі займалася фірма "Лепшы брэнд". 80% гэтай кампаніі належыць Дзмітрыю Баскаву і 20% запісаныя на нейкую Марыну Анфілаву.

Праз год, у верасні 2023-га Баскаў зарэгістраваў новую юрыдычную асобу — "Лепшы хлеб". Яна займаецца вытворчасцю хлебабулачных і кандытарскіх вырабаў. На балансе фірмы цяпер лічацца нарыхтовачны цэх і кавярня "Лепшы хлеб" у Першым нацыянальным гандлёвым доме на праспекце Незалежнасці, 134, а таксама дзве пякарні ў сталічных гандлёвых цэнтрах "Скала" (вул. Пятра Глебкі, 5) і "Чэрвеньскі" (вул. Маякоўскага, 6).

Як адзначаюць расследвальнікі, Баскаў валодае 60% "Лепшага хлеба". Астатнія 40% пароўну падзеленыя паміж беларусамі Арцёмам Васільевым і Паўлам Турбанам. Дарэчы, Турбан, як выявілі "Кіберпартызаны", працаваў у Федэрацыі хакея Беларусі і кухарам у хакейным клубе "Дынама-Мінск".

Пры канцы траўня 2025 года ў Баскава з'явілася яшчэ адна фірма — "Лепшы экіпіровачны цэнтр". Яна займаецца рознічным гандлем спартовым абсталяваннем і інвентаром. Урачыстае адкрыццё крамы Lepshy hockey адбылося 16 кастрычніка на "Алімпік-Арэне", якая падпарадкоўваецца Нацыянальнаму алімпійскаму камітэту (кіраўнік Віктар Лукашэнка). У краме прадаюць хакейны рыштунак і экіпіроўку.

"Лепшы экіпіровачны цэнтр" мае трох уладальнікаў. 34% належаць Арцёму Завадскаму. Ён таксама з’яўляецца заснавальнікам і дырэктарам фірмы "Хакейны кантынент", якая мае ўласную інтэрнэт-краму хакейнай формы і экіпіроўкі.

15% акцый належаль Норберту Масальскаму — гендырэктару прадпрыемства "Спорт-люкс", якое таксама займаецца продажам хакейнай экіпіроўкі. Гандаль хакейнай экіпіроўкай Масальскі сумяшчае з працай у Федэрацыі хакея.

А 51% акцый валодае Дзмітрый Баскаў.  

Менш чым за тры месяцы працы крамы фірма "Лепшы экіпіровачны цэнтр" атрымала выручку каля 1,2 мільёна рублёў, ці амаль 350 тысяч еўра. Чысты прыбытак па выніках 2025 года склаў 74 тысячы рублёў, ці амаль 21,5 тысячы еўра.

У тым ліку — за грошы падаткаплатнікаў. Як выявілі журналісты, за тры няпоўныя месяцы 2025 года фірма Баскава заключыла дамовы на пастаўку хакейнай экіпіроўкі розным спартовым арганізацыям амаль на 450 тысяч рублёў, ці на 130 тысяч еўра. Да пачатку красавіка 2026 года гэтая сума павялічылася ўжо да 675 тысяч рублёў, ці амаль да 200 тысяч еўра.

Пры гэтым вялікая частка закупак рабілася па працэдуры закупкі з адной крыніцы. Яна лічыцца больш простай і менш канкурэнтнай працэдурай выбару пераможцы.