У Літве абвяшчалі паветраную трывогу і падымалі ў паветра знішчальнікі NATO

У Літве і Латвіі зранку 20 траўня абвяшчалі паветраную трывогу ў сувязі з пагрозай беспілотнікаў.

Каля латвійскай сталіцы спынілі пасажырскі цягнік літоўскай кампаніі LTG Link — ён накіроўваўся з Вільні праз Рыгу ў бок мяжы з Эстоніяй. Таксама ў краіне спынялі іншыя цягнікі, перадае інфармагенцтва BNS.

Па ўсёй Літве была абвешчаная паветраная трывога, жыхарам краіны рэкамендавалі спусціцца ў сховішчы. Аэранавігацыйная служба закрыла паветраную прастору над аэрапортам Вільні. Прычына — дрон, які ляціць з тэрыторыі Беларусі.

"Паветраная пагроза. Неадкладна скіруйцеся ў сховішча або іншае бяспечнае месца. Паклапаціцеся пра сваякоў, чакайце далейшых указанняў. Пра завяршэнні трывогі жыхары будуць праінфармаваныя асобным апавяшчэннем", — сказана ў паведамленні, якое жыхары Літвы атрымліваюць на мабільныя тэлефоны.

У паветра паднятыя натаўскія знішчальнікі.

У падземныя сховішчы спусцілася ўсё кіраўніцтва краіны, у тым ліку прэзідэнт Гітанас Наўседа.

Адмянілі паветраную трывогу ў Вільні каля 11-й гадзіны паводле мінскага часу.