У польскай пракуратуры расказалі, чаму стралялі ў беларуса
Аўтамабіль беларуса, у якім адзначылі кулявыя адтуліны / "Беларусь 1"
Беларус накіраваў на польскіх паліцыянтаў аўтамабіль і не планаваў спыняцца. Таму яны адкрылі агонь. Пра гэта гаворыцца ў адказе пракуратуры Уроцлава, які атрымала выданне MOST.
Беларускі Следчы камітэт паведамляў, што 12 траўня польская паліцыя беспадстаўна адкрыла агонь па 60-гадовым беларускім кіроўцу са Слоніма. Мужчына, маўляў, атрымаў агнястрэльныя раны і пасля перасячэння мяжы быў шпіталізаваны ў цяжкім стане. У аўтамабілі налічылі 29 кулявых адтулін. Канал "Беларусь 1" пазней паведаміў, што мужчыну даставілі ў бальніцу ў Польшчы, але там нібыта аказалі дапамогу з грубымі парушэннямі, а праз некалькі дзён яго проста выкінулі.
У адказе польскай пракуратуры гаворыцца, што паліцыянты шукалі асобаў, якія ўгналі аўтамабілі марак Citroen і Peugeot. Яны заўважылі на трасе Citroen, які адпавядаў апісанню, і паехалі за ім. Яго суправаджаў BMW. У зоне адпачынку, куды заехалі абодва аўто, паліцыянты пайшлі з праверкай дакументаў ва ўсіх кіроўцаў.
"Кіроўцу аўтамабіля BMW было загадана пакінуць транспартны сродак, а паколькі ён не рэагаваў, яго выцягнулі з аўтамабіля і надзелі на яго кайданкі. У гэты час кіроўца Citroen пакінуў месца здарэння, наехаўшы на ступню супрацоўніка паліцыі. За ім накіраваўся адзін з патрулёў", — паведамляе пракуратура.
У нейкі момант да стаянкі пад'ехаў яшчэ адзін аўтамабіль BMW. Ён спрабаваў перашкодзіць паліцыянтам, "выконваючы небяспечныя манеўры — рэзка здаючы назад і паварочваючы, а таксама накіроўваючы аўтамабіль у бок супрацоўнікаў паліцыі, з прычыны чаго ў дачыненні да яго была ўжытая агнястрэльная зброя".
Пракуратура вядзе дзве справы. Адна з іх — на кіроўцу, які наехаў на ступню паліцыянту, і на таго, які накіроўваў на паліцыю аўтамабіль. Трэці кіроўца, якога выцягнулі з машыны, фігурантам справы не стаў.
Падрыхтоўчая вытворчасць па другой справе датычыць магчымага перавышэння паўнамоцтваў супрацоўнікамі паліцыі.
Паводле звестак польскіх СМІ, раненні не пагражалі жыццю беларускага кіроўцы.
Таксама варта дадаць, што дарога ад месца здарэння да мяжы з Беларуссю займае каля 500 км.
