Праехаў 500 км з цяжкім раненнем? Польшча падае сваю версію ранення беларуса

У польскіх СМІ з'явілася версія мясцовай паліцыі пра тое, як беларус атрымаў раненні ў Польшчы. Яна істотна адрозніваецца ад афіцыйнай беларускай.

Напярэдадні МЗС Беларусі заявіла, што 12 траўня ў Польшчы беларус атрымаў агнястрэльныя раненні. Паведамлялася, быццам польскія праваахоўнікі прынялі групу беларусаў за злачынцаў і адкрылі страляніну.

Пазней Следчы камітэт Беларусі заявіў, быццам паліцыянты беспадстаўна напалі на 60-гадовага слонімца каля горада Сыцуў (Ніжнесілезскае ваяводства). Нібыта кіроўца "атрымаў цяжкія агнястрэльныя раненні галавы і канечнасцяў, таксама пашкоджанні атрымаў аўтамабіль — у выглядзе 29 кулявых адтулін". Пры гэтым мужчына перасек мяжу, і ўжо ў Беларусі яго экстрана шпіталізавалі ў вельмі цяжкім стане.

Іншая версія з'явілася ў польскіх СМІ. Паводле tvn24.pl, у ноч на 12 траўня паліцыянты правяралі двух кіроўцаў у зоне абслугоўвання падарожнікаў. Адзін з іх вырашыў уцякаць і пераехаў паліцыянту ступню. Пасля пагоні яго затрымалі. З другім кіроўцам асаблівых праблем не было.

Аднак падчас праверкі да паліцыянтаў пад'ехаў трэці кіроўца — знаёмы абодвух папярэдніх. Ён рушыў на паліцэйскіх і ігнараваў патрабаванні спыніцца. Паліцыянты расцанілі гэта як напад, які пагражае іх жыццю і здароўю, таму адкрылі агонь. Кіроўца быў паранены, супрацоўнікі паліцыі аказалі яму першую дапамогу на месцы і выклікалі хуткую, якая адвезла яго ў бальніцу. Паводле звестак паліцыі, раненні не пагражалі жыццю мужчыны.

Польская пракуратура правярае абгрунтаванасць і спосаб ужывання зброі, а таксама высвятляе, чаму адзін з мужчын уцякаў ад праверкі, а другі рушыў на супрацоўнікаў.

Ад горада Сыцуў да польска-беларускай мяжы — прыкладна 500 км дарогі. Беларускія следчыя не тлумачаць, як паранены чалавек "у вельмі цяжкім стане" праехаў такую адлегласць і перайшоў мяжу.