У Варшаве адчынілася новая кнігарня беларускай кнігі Kamunikat shop

У памяшканні праваабарончай арганізацыі Цэнтра беларускай салідарнасці (ЦБС) па адрасе вуліца Алеандраў 6, адкрылася кнігарня Kamunikat shop (Камунікат шоп).

Гэтая прастора ўзнікла дзякуючы стратэгічнаму партнёрству паміж ЦБС і Фондам Kamunikat, які займаецца выдавецкай дзейнасцю на Беласточчыне.

На момант адкрыцця ў кнігарні прадстаўлена больш за 500 назваў кніг ад 14 незалежных выдавецтваў, якія з-за палітычнага пераследу ў Беларусі былі вымушаныя рэлакавацца ў розныя краіны Еўропы. Сярод партнёраў праекта — выдавецтвы Kamunikat (Беласток), “Гутэнберг” (Кракаў), “Янушкевіч” і “Славянка” (Варшава), “Логвінаў” (Вільня), Skaryna Press (Лондан), “Вясна” (Прага), Magenta (Варшава) і іншыя

Акрамя сучаснай літаратуры ад эміграцыйных выдаўцоў, у кнігарні можна знайсці кнігі беларускай нацыянальнай меншасці ў Польшчы, у прыватнасці выданні тыднёвіка "Ніва" і Цэнтра беларускай культуры ў Беластоку

Пляцоўка Kamunikat shop будзе выконваць функцыю не толькі гандлёвай кропкі, але і культурнага хаба. Арганізатары плануюць праводзіць тут перыядычныя сустрэчы з пісьменнікамі (мінімум раз на месяц), прэзентацыі новых выданняў і сумесныя кніжныя кірмашы.

Кіраўнік фонду Kamunikat Яраслаў Іванюк падкрэсліў важную лагістычную ролю новай кнігарні.

“Беларускія выдавецтвы раскіданыя па ўсім свеце — ад Вільні да Лондана. Мы сабралі іх тут, у цэнтры Варшавы, што з’яўляецца доказам запатрабаванасці беларускай кнігі ў эміграцыі”, — зазначыў кнігавыдавец падчас цырымоніі адкрыцця.

На падзею завіталі польскія афіцыйныя асобы і грамадскія дзеячы. Спецыяльны пасланнік МЗС Польшчы Адам Халацінскі адзначыў, што гэтая ініцыятыва “адлюстроўвае глыбокую прыхільнасць беларусаў да сваёй тоеснасці, традыцый і мовы”. А прэзідэнт Фонду гісторыі і культуры Вальдэмар Міхальскі павіншаваў беларускіх калег і пацвердзіў гатоўнасць польскіх выдаўцоў далей падтрымліваць такія праекты, запрашаючы да ўдзелу ў буйных міжнародных кніжных кірмашах.

Прадстаўнік Аб’яднанага Пераходнага Кабінета Павал Латушка падсумаваў значнасць падзеі, назваўшы яе “сведчаннем таго, што беларуская культура жыве”, бо без кнігі немагчыма ўявіць існаванне нацыі і дзяржавы

На адкрыцці таксама выступіў пісьменнік Уладзімір Арлоў, які заклікаў беларусаў чытаць і дарыць кнігі дзецям, каб захоўваць здольнасць мысліць па-беларуску