У юнай гамяльчанкі, якую пакусалі сабакі, з'явіліся праблемы з памяццю

11-гадовая гамяльчанка Ліда, якую 8 траўня пакусалі бяздомныя сабакі, усё яшчэ лечыцца ў стацыянары. Пра гэта паведамляюць "Моцныя навіны" са спасылкай на траўматолага-артапеда Гомельскай абласной дзіцячай клінічнай бальніцы Аляксея Прылопскага.

Стан здароўя школьніцы ацэньваюць як практычна здавальняючы. Яна атрымлівае неабходную медыцынскую дапамогу. Дактары абяцаюць, што хутка здымуць швы і Ліда вернецца да паўнавартаснага жыцця.
 
Аднак бацька дзяўчынкі ў размове з журналістамі расказаў, што ў яе з'явіліся праблемы з памяццю.
 
"Яна кажа: "Я з вамі размаўляю і тут жа забываю. Я не памятаю, што ўчора было". Потым як бы яна ўспамінае. Размаўляе і забывае, пра што размаўляе", — кажа мужчына.
 
Тым часам у Гомелі працягваюць адлоўліваць бяздомных сабак. У "Спецкамунтрансе" заяўляюць, што каля таго месца, дзе сабакі напалі на Ліду, пастаянна дзяжурыць экіпаж, аднак бяздомныя жывёлы мігруюць і могуць прыйсці з суседняга мікрараёна.
 
Як паведамлялася раней, бяздомныя сабакі напалі на дзяўчынку, калі яна адна ішла дадому. Яны ўчапіліся ёй у ногі, а калі дзяўчынка павалілася, сталі кусаць яе па ўсім целе. Выратаваў школьніцу мужчына, які праязджаў міма на матацыкле.

Мяркуюць, што сабакі маглі ахоўваць сваю тэрыторыю і таму напалі на дзяўчынку. Недалёка ад месца нападу матацыкліст, які выратаваў школьніцу, знайшоў буданы бяздомных людзей. Яны фактычна прыручылі агрэсіўную зграю. Камунальнікі ўжо ліквідавалі "лагер" бяздомных, а частку сабак забралі ў вальеры на каранцін. Пакуль невядома, ці ёсць сярод іх тыя, што напалі на Ліду.