Украіна ў ААН прыгразіла разбуральнымі наступствамі ў выпадку атакі з Беларусі
Андрэй Мельнік / Пастаяннае прадстаўніцтва Украіны пры ААН
Украіна спадзяецца, што ўварвання з боку Беларусі не будзе. Калі ж такое адбудзецца, Украіна будзе абараняцца ў адпаведнасці з артыкулам 51 Статута Арганізацыі Аб'яднаных Нацый (права дзяржаў на самаабарону ў выпадку ўзброенага нападу). Пра гэта на пасяджэнні Савета бяспекі ААН заявіў пастаянны прадстаўнік гэтай краіны Андрэй Мельнік.
"Мы ўважліва сочым за дзеяннямі Расіі, накіраванымі на далейшае ўцягванне Беларусі ў агрэсію супраць Украіны. Гэта яшчэ адно трывожнае пытанне і яшчэ адна новая пагроза, на якую я хацеў бы звярнуць увагу Савета бяспекі", — цытуе інфармагенцтва "Укрінформ" словы Мельніка.
Дыпламат заявіў, што рэжым Лукашэнкі фактычна здаў суверэнітэт і дазволіў Расіі выкарыстоўваць тэрыторыю Беларусі, яе вайсковую інфраструктуру і паветраную прастору. Таксама Мельнік сказаў, што Крэмль актыўна падштурхоўвае Беларусь да больш глыбокага ўцягвання ў вайну. Сярод іншага ён нагадаў пра беларуска-расійскія вучэнні, звязаныя з выкарыстаннем ядзернай зброі.
"Любая атака з поўначы выкліча неадкладны і рашучы адказ, а рэжым у Мінску сутыкнецца з разбуральнымі наступствамі", — заявіў украінскі прадстаўнік. Ён таксама заклікаў Савет бяспекі ААН аказаць ціск на Маскву і Мінск, каб прадухіліць эскалацыю вайны.
