За дапамогу ў паветранай кантрабандзе з РБ у Літве арыштавалі 13 паліцыянтаў і памежнікаў
Затрыманні ў Літве / NULL
У Літве прайшла буйная аперацыя супраць паветранай кантрабанды з Беларусі. У яе рамках былі затрыманыя 27 чалавек. Пра гэта паведамляе выданне Delfi са спасылкай на намесніка генкамісара паліцыі Літвы Маруса Драўдвілу.
Сярод затрыманых — 13 паліцыянтаў і памежнікаў, якіх падазраюць у "паветранай кантрабандзе" і "дапамозе" Беларусі.
Восем затрыманых працавалі ў паліцэйскіх камісарыятах, трое — у Службе аховы дзяржаўнай мяжы. Паводле Драўдвілы, супрацоўнікі перадавалі кантрабандыстам службовую інфармацыю.
Гаворка ідзе пра метэазонды з кантрабанднымі цыгарэтамі, якія запускалі з тэрыторыі Беларусі ў Літву. Праз іх неаднаразова прыпынялася праца Віленскага аэрапорта.
"Іх дзеянні адпавядаюць інтарэсам іншых варожых дзяржаў, таму іх можна кваліфікаваць не толькі па артыкуле аб кантрабандзе. Іх дзейнасць звязана з палітыкай суседняй дзяржавы. Яна наносіць шкоду не толькі эканамічнай сітуацыі ў Літве, але і нацбяспецы", — каментуе пракурор Марцінас Ёвайша.
Агулам па дасудовым расследаванні справы пра кантрабанду з Беларусі ўжо 49 падазраваных. Як кажа Драўдвіла, групоўкі ў Літве і Беларусі арганізавалі "сакрэтнае аб'яднанне з жорсткім унутраным кантролем".
