Замежнік у Добрушы забіў цяжарную жонку, парэзаў пасынка і згвалтаваў падчарыцу

У верасні 2023 года ў Добрушы замежнік мучыў сваю падчарыцу, якой на той час было 16 гадоў — біў, цягаў яе за валасы і душыў. Адна з нагодаў — тое, што дзяўчынка карысталася мабільнікам. Спыніўся ён толькі пасля таго, як міліцыя адрэагавала на паведамленне са школы і пачала праверку.

Як паведамляе Генпракуратура, 9 кастрычніка 2025 года мужчына з асаблівай жорсткасцю забіў сваю 35-гадовую жонку, пра цяжарнасць якой ён ведаў. Ударыў яе нажом у грудзі і шыю. Жанчына памерла на месцы ад страты крыві. Калі 16-гадовы пасынак заступіўся за маці, мужчына чатыры разы ўдарыў яго нажом у грудзі і па канцавінах.

Потым ён, пагражаючы нажом, згвалтаваў падчарыцу. Калі на месца прыбыў АМАП, мужчына ўзяў падчарыцу закладніцай, трымаючы нож каля яе грудзей і жывата. Ён патрабаваў, каб міліцыянты аддалі яму сваю зброю і пакінулі дом. Аднак яны здолелі абяззброіць зламысніка і вызваліць дзяўчыну.

У той жа дзень усіх дзяцей забралі ў бальніцу, пасля чаго накіравалі ў тэрытарыяльны сацыяльна-педагагічны цэнтр. Потым іх перадалі ў прыёмную сям'ю.

Мужчына знаходзіцца пад вартай. Пракуратура перадала яго справу на разгляд у Гомельскі абласны суд.