ЗША і Іран абмяняліся ўдарамі на фоне дзеючага перамір'я

Армія ЗША нанесла ўдары па радарах і пунктах кіравання беспілотнікамі ў раёне Горук і на востраве Кешм у Іране 30 і 31 траўня 2026 года.

Нагодай стаў збіты іранскім бокам амерыканскі беспілотнік MQ-1 над міжнароднымі водамі. У CENTCOM паведамілі, што падчас атак былі знішчаныя сродкі супрацьпаветранай абароны, наземны пункт кіравання і каля двух ударных беспілотнікаў, якія пагражалі суднаходству ў рэгіёне.

У Корпусе вартавых ісламскай рэвалюцыі (КВІР) заявілі пра ўдар у адказ па амерыканскай авіябазе, з якой ажыццяўлялася атака, і паведамілі пра "знішчэнне наземных цэляў". 

"У выпадку паўтарэння атакі рэакцыя будзе зусім іншай", — адзначылі ў КВІР.

Перамір'е паміж ЗША і Іранам было абвешчана прэзідэнтам Дональдам Трампам на пачатку красавіка. Раней бакі ўжо абменьваліся ўдарамі ў Армузскім праліве на пачатку траўня: амерыканскія вайскоўцы атакавалі порт Бандар-Абас і востраў Кешм, а Іран нанёс удары па трох эсмінцах ЗША.

Паводле звестак Axios, 31 траўня Трамп запатрабаваў канкрэтызаваць умовы пагаднення, якое рыхтуецца, у частцы адмовы Тэгерана ад узбагачанага ўрану. У Міністэрстве замежных спраў Ірана паведамілі пра працяг кантактаў з амерыканскім бокам.