Ад начной расійскай атакі на Дняпро і Адэсу пацярпелі 20 чалавек, у іх ліку дзеці

У ноч на 18 траўня расійскія войскі запусцілі па Украіне 22 ракеты і 524 дроны. Такую статыстыку называе камандаванне Паветраных сіл УСУ.

Украінская супрацьпаветраная абарона збіла і падавіла 4 крылатыя ракеты "Іскандэр-К" і 503 беспілотнікі розных тыпаў. Аднак 18 ракет і 16 ударных БПЛА пацэлілі па 34 лакацыях.

Як паведамляе hromadske.ua, найбольшую колькасць пацярпелых ад начной расійскай атакі зафіксавалі ў Дняпры і Адэсе.

У Дняпры налічваецца 18 пацярпелых. У тым ліку дапамога медыкаў спатрэбілася 10-гадоваму хлопчыку і двухгадовай дзяўчынцы. Дзеці знаходзяцца на амбулаторным лячэнні. Восем чалавек шпіталізаваныя, медыкі ацэньваюць іх стан як сярэдняй цяжкасці.

Пасля начной атакі ў горадзе пачаліся пажары. У адным з пашкоджаных дамоў заблакаваныя людзі. У Дняпроўскім раёне расіяне пацэлілі ў склад, дзе захоўвалася піратэхнічная прадукцыя, — там таксама пачаўся пажар.

У Адэсе падчас дронавай атакі былі пашкоджаныя жылыя дамы, будынкі ліцэя і дзіцячага садка. Вядома прынамсі пра двух пацярпелых — гэта 11-гадовы хлопчык і 59-гадовы мужчына. Ім аказваюць усю неабходную медыцынскую дапамогу.