Атакі на платформу па выбарах у КР каштавалі 100-200 тысяч еўра — Лібер

Сёлетнія выбары ў Каардынацыйную раду адбываліся ва ўмовах "новай лічбавай рэальнасці". Пра гэта заявіў стваральнік платформы для галасавання на выбарах Павел Лібер.

У допісе ў Фэйсбуку ён падкрэсліў, што яго камандзе давялося супрацьстаяць праціўніку, які мае неабмежаваны рэсурс і задачу зламаць платформу любым коштам:

"На жаль, гэтыя выбары паказалі новую лічбавую рэальнасць, дзе рэжым можа стварыць сапраўды важкую нагрузку і калі днём і ноччу на працягу сямі дзён даводзіцца ўсёй камандай трымаць інфраструктуру пад бесперапыннымі нападамі, спробамі раскалупаць пратаколы і інфармацыйнымі ўкідамі. Гэта ўжо не аналагавыя дэбілы з 2020-га, і грамадзянскаму сектару варта сур'ёзна яшчэ раз задумацца пра лічбавую бяспеку".

Нагадаем, што на пачатку галасавання праз DDoS-атаку паўсутак не працаваў сайт выбараў. Пазней з пытанняў бяспекі адрас сайта давялося перанесці.

"І мы выстаялі, хоць кошт гэтых нападаў у такіх аб'ёмах я б ацэньваў бліжэй да 100К+ еўра, а калі яны плацілі за ўвесь трафік па сярэдніх рынкавых цэнах, то магло і 200к+", — піша Лібер.

Ён адзначае, што аптайм (бесперапынны час працы) платформы склаў 95,2%.

73 чалавекі не змаглі прагаласаваць праз тэхнічныя прычыны, выкліканыя нападамі.

Па дапамогу да распрацоўшчыкаў праз тэлеграм і электронную пошту звярнуліся 64 чалавекі, 36 з іх потым змаглі прагаласаваць.

"У выглядзе DDoS-нападаў да нас прыйшло крыху больш чым 24 млрд запытаў і 68 Tb трафіку.
Асобны ўдар (сотні Tb) прыйшоўся з Google Storage бакет, дзе за некалькі дзён запар выпампоўваліся ліміты бакета па ўсіх рэгіёнах, што вымусіла нас змяніць сайт для галасавання", — дзеліцца падрабязнасцямі Лібер.