Беларус выкупіў большую частку крам Samsung у Польшчы
Крама Samsung / news.samsung.com
Беларус з Кіпра Сяргей Касцевіч набыў 13 прэміум-крам Samsung Brand Store у Польшчы, піша тэлеграм-блогер Вадзім Сяховіч. Яны каштавалі яму 11,746 млн долараў. Пра гэта гаворыцца ў кансалідаванай гадавой справаздачнасці ASBIS Enterprises.
Пакупніком выступіла адна з трох польскіх юрыдычных асоб Сяргея Касцевіча — ASBC Poland (створаная ў 2022 годзе ў Рашыне). Да іх перайшла большая палова крам паўднёвакарэйскага брэнда ў Польшчы: у Варшаве, Вроцлаве, Познані, Катавіцах, Лодзі і Шчэціне.
У ASBIS Group гэтую здзелку называюць часткай стратэгіі па развіцці сваёй прэміяльнай рознічнай сеткі. У афлайн-сегменце Сяргей Касцевіч праз ASBC у цяперашні час кіруе 33 крамамі Apple Premium Reseller (iSpace) у 7 краінах і шасцю гандлёвымі аб’ектамі Bang & Olufsen у пяці. У канцы 2025 года ASBC адкрыла найбуйнейшую ў свеце флагманскую краму Bang & Olufsen у Сан-Францыска. У бягучым годзе кампанія плануе пашырыць сваю каліфарнійскую сетку на Лос-Анджэлес і Пала-Альта.
