Беларускі рэжысёр атрымаў у Канах узнагароду за будучы інтрыгоўны праект
Аляксей Палуян падчас публічнага выступу / Aliaksei Paluyan
Беларускі рэжысёр Аляксей Палуян атрымаў узнагароду Berlinale Talents Lab Awards за праект мастацкага фільма “Інкубатар”, заўважыў тэлеграм-канал “Свяшчэнны Белавуд”. Узнагароду ў рамках Канскага кінафестывалю яму ўручыў нямецкі рэжысёр Том Тыквер.
З “Інкубатарам” Палуян сёлета ўдзельнічаў у праграме Berlinale Talents 2026. Гэта драма пра беларуску Марыю, якая становіцца сурагатнай маці ва Украіне, каб сабраць грошы на вызваленне мужа, асуджанага ў Беларусі на дзевяць гадоў па палітычных матывах.
З пачаткам поўнамаштабнай вайны яна разам з нованароджаным дзіцем аказваецца ў зоне баявых дзеянняў.
Праект ствараецца ў капрадукцыі Германіі і Францыі, а вытворчасць запланавана на 2028 год.
Гэта будзе другі поўнаметражны ігравы фільм Палуяна пасля “Спадчыны” — стужкі пра падзеі жніўня 2020 года ў Беларусі. У цэнтры сюжэта — сям’я, якая мусіць вызначыцца паміж вернасцю рэжыму і супрацівам.
Праект, над якім рэжысёр працаваў больш за пяць гадоў, падтрымала Міністэрства культуры Германіі і нядаўна Польскі кінаінстытут.
Яго здымкі павінны пачацца ўлетку 2026 года ў Польшчы.
Аляксей Палуян родам з Баранавічаў, але зараз жыве і працуе ў Германіі. Ён перадусім вядомы праз кароткаметражную экранізацыю кнігі Віктара Марціновіча “Возера радасці” і поўнаметражны дакументальны фільм “Смеласць” пра пратэсты 2020 года.
