Чыгунка вяртае "Штадлеры" на маршрут Мінск-Рудзенск
Цягнік "Штадлер"
Беларуская чыгунка 19 траўня вярнула гарадскія электрычкі Stadler на маршрут Мінск-Рудзенск. Гэта адбылося "пасля завяршэння планавых відаў рамонту", паведамляе прэсс-служба БЧ.
Па гэтым маршруце будуць курсіраваць чатыры пары цягнікоў гарадскіх ліній. Таксама дзве пары дадатковых цягнікоў дадалі з 19 траўня на маршрут Мінск-Беларусь.
"Беларуская магістраль працягне прымаць меры па далейшым задзейнічанні наяўнага маторвагоннага рухомага складу названай серыі для абслугоўвання цягнікамі гарадскіх ліній сацыяльна значных напрамкаў, у тым ліку якія злучаюць сталіцу Беларусі з гарадамі-спадарожнікамі", — заяўляюць у БЧ.
Праблемы з электрацягнікамі "Штадлер" пачаліся ў выніку міжнародных санкцый, пад якія трапіла Беларусь. Пасля некалькіх паведамленняў пра паломкі цягнікоў і іх замену Беларуская чыгунка стала засакрэчваць такую інфармацыю.
