Ціханоўская наведала Сцяну памяці і ўшанавала загінулых герояў
Святлана Ціханоўская прыйшла да Сцяны памяці / прэс-служба Ціханоўскай
Падчас візіту ў Кіеў Святлана Ціханоўская наведала Сцяну памяці. Разам з міністрам замежных справаў Украіны Андрэем Сібігам яна ўшанавала памяць загінулых герояў, у тым ліку беларускіх добраахвотнікаў.
Лідарка беларускіх дэмакратычных сілаў, як паведамляе яе прэс-служба, згадала беларускіх і украінскіх герояў, якія аддалі жыцці за свабоду. Яна падкрэсліла, што Украіна змагаецца не толькі за сябе, але і за агульную будучыню рэгіёна: "Мы схіляем галовы перад кожным, хто стаў на абарону сваёй краіны, свайго народа і агульных каштоўнасцяў свабоды і годнасці".
Ціханоўская нагадала, што ў гэтай вайне на баку Украіны загінулі ўжо больш за 80 беларусаў. "Мы памятаем кожнага. Іх імёнамі будуць названыя вуліцы ў вольнай Беларусі. Яны абараняюць не толькі Украіну — яны абараняюць гонар беларускага народа і змагаюцца за нашу агульную свабоду", — заявіла яна.
Палітык згадала і пра тых, хто трапіў у расійскі палон, і пра тых ветэранаў і добраахвотнікаў, якія страцілі здароўе, прайшлі праз раненні і выпрабаванні. Яна заявіла, што падтрымліваць іх ды іх сем’і — гэта наш абавязак.
Ціханоўская назвала сённяшнюю Украіну прыкладам мужнасці, стойкасці і годнасці для ўсяго рэгіёна.
