Да папярэджанняў Зяленскага ў адрас Лукашэнкі далучыліся Кулеба і "Мадзяр"

У адрас Аляксандра Лукашэнкі працягваюць гучаць папярэджанні ад украінскіх чыноўнікаў і вайскоўцаў. Услед за Уладзімірам Зяленскім да Лукашэнкі ўжо двойчы звярнуўся камандуючы Сіламі беспілотных сістэм Украіны Роберт "Мадзяр" Броўдзі.

16 мая ён напісаў у сябе ў Facebook:

"Мінскі гаўляйтар Лукашэску!

Мы фіксуем пралёт кожнага асобнага “Шахеда”, які, скарыстаўшыся калідорамі Беларусі, накіроўваецца ва Украіну, кожную тваю выхадку і кіданні з мілітарысцкім адценнем…

Ты можаш колькі заўгодна круціць вусы перад камерай і хлусіць свайму запалоханаму народу пра “нейтралітэт”, але твае рукі ўжо па самыя плечы ў крывавай жыжы забойстваў мірных украінцаў.

Наступны трэк: калідор для забойцаў = саўдзел = расплата".

17 мая ён жа напісаў наступнае:

"Юстас — Аляксу Рыгоравічу: важна, як увайсці ў патрэбную размову, але яшчэ важнейшае — мастацтва выйсці з яе.

Лукашэску, прыглядайся да перспектыў".

У сваю чаргу былы міністр замежных спраў Украіны Дзмітрый Кулеба ў эфіры свайго YouTube-канала заявіў, што Беларусь нібыта збіраецца ўступіць у вайну супраць Украіны, і папярэдзіў пра наступствы.

"Калі Беларусь на нас нападзе, туды столькі ўсяго паляціць і столькі будзе разбурана, што “мама не гаруй”. І гэта можа сур’ёзна расхістаць Беларусь", — сказаў ён.

На думку Кулебы, цяпер на парадку дня стаяць такія пытанні: у якім кірунку будуць вылучацца беларускія войскі і ў якія тэрміны.

Нагадаем, што раней прэзідэнт Украіны Уладзімір Зяленскі заявіў, што ў Аляксандра Лукашэнкі былі кантакты з расіянамі, якія пераконваюць яго далучыцца да вайны супраць Украіны.