Гістарычную сядзібу, дзе працаваў Янка Купала, ператварылі ў сметнік
Сядзіба Беліца / planetabelarus.by
Улады Сенненскага раёна даўно і безвынікова спрабуюць прадаць паўразбураную сядзібу роду Свяцкіх "Беліца" ў вёсцы Полымя — гістарычную каштоўнасць 2-й катэгорыі.
Цяпер зрабіць гэта стала яшчэ больш праблематычна, заўважыла выданне Orsha.eu: падчас пракурорскай праверкі стану гістарычных месцаў выявілася, што на тэрыторыі былой сядзібы ўтвораны сметнік. Туды згружаюць бытавое смецце і адходы драўніны.
Усе будынкі сядзібы з'яўляюцца гістарычнымі помнікамі XVIII стагоддзя. Таксама яна звязаная з гісторыяй беларускай літаратуры. У 1903-1904 гадах тут канторшчыкам, а потым аканомам працаваў Янка Купала. Менавіта ў Беліцы ён пачаў пісаць свае першыя творы.
Зрэшты, сенненскія ўлады ігнаруюць стан не толькі сядзібы. На васьмі помніках археалогіі, якія маюць статус каштоўнасцяў 3-й катэгорыі, пракурорская праверка не выявіла ахоўных шыльдаў.
