У Заслаўі знайшлі рэшткі храма ХІІ стагоддзя, які не згадваецца ў летапісах
Заслаўе / pristalica.by
У Заслаўі падчас археалагічных раскопак у гістарычным цэнтры горада знайшлі сляды невядомага раней каменнага храма часоў Старажытнай Русі. Знаходку археолагі зрабілі ўлетку 2025 года, але публічна пра яе расказалі толькі цяпер на міжнароднай канферэнцыі ў Нясвіжы, піша выданне "Прысталічча".
У цэнтральнай частцы Рыначнай плошчы Заслаўя выявілі фрагменты плінфы — шырокай плоскай цэглы, характэрнай для візантыйскай і старажытнарускай храмавай архітэктуры. Тамсама археолагі зафіксавалі добра захаваны культурны слой XII–XIX стагоддзяў.
На падставе знаходак даследчыкі мяркуюць, што ў Заслаўі быў уласны каменны храм. Аднак звестак пра яго няма ні ў летапісах, ні ў іншых пісьмовых крыніцах.
Паведамляецца, што раскопкі адбываліся падчас падрыхтоўкі да "Дажынак". Акрамя слядоў храма навукоўцы знайшлі разнастайныя артэфакты XII стагоддзя: нажы, крэсівы, дэталі конскай збруі, званочак ды іншыя рэчы.
