Каля 100 студэнтаў пакінулі ЕГУ пасля абвяшчэння "экстрэмісцкага" статусу

Пасля таго, як Еўрапейскі гуманітарны ўнверсітэт абвясцілі ў Беларусі "экстрэмісцкай арганізацыяй", яго пакінулі каля сотні студэнтаў. Пра гэта рэктар ЕГУ  Вілюс Шадаўскас расказаў у гутарцы з Радыё Свабода.

"У нас было дзве сурʼёзныя падзеі — у верасні летась (калі ўлады Беларусі прызналі "экстрэмісцкімі" сайт і сацыяльныя сеткі ЕГУ. — РС) і 14 красавіка сёлета. Каля 50 студэнтаў пакінулі вучобу ў верасні мінулага года. Але тады ж у нас склалася вельмі цікавая сітуацыя, бо кожны дзень нейкія студэнты пакідалі вучобу і нехта вяртаўся з акадэмічнага адпачынку. Такім чынам гэтыя дзве лічбы канкуравалі, і, здаецца, на 10 студэнтаў больш з'ехала, чым вярнулася вучыцца", — згадвае рэктар.

А з 14 красавіка па 14 траўня ўніверсітэт страціў 100 студэнтаў.

Паводле Шадаўскаса, навучальны год у ЕГУ пачалі 1600 студэнтаў, на пачатку другога семестра іх заставалася 1129. А на цяперашні час універсітэт налічвае каля 1000 студэнтаў. Пры гэтым 70-75% з іх складаюць беларусы.

Рэктар кажа, што сілавыя структуры Беларусі цікавіліся студэнтамі ЕГУ і да "экстрэмісцкага" статусу.

"У калядныя ці летнія вакацыі з канкрэтнымі студэнтамі праводзілі "сустрэчы" і "гутаркі". У нас была гіпотэза, што некаторых студэнтаў апытвалі не таму, што яны студэнты ЕГУ, але таксама таму, што яны займаліся нейкай актыўнай дзейнасцю, няўрадавымі арганізацыямі, іншым. Такія выклікі і апытанні заўсёды былі. А цяпер іх пабольшала, мы пра іх ведаем. Усяго каля 10 выпадкаў. Гэта ў асноўным тычыцца студэнтаў, якія вучацца на завочным аддзяленні", — адзначае ён.

Шадаўскас дадае, што студэнтаў-завочнікаў у ЕГУ каля 30% ад агульнага складу, а ў Беларусі — каля 10%. Некаторыя з іх спынілі навучанне. Сярод студэнтаў-завочнікаў у Літве навучанне спынілі 10 чалавек.

Пра тое, што рэжым Лукашэнкі прызнаў ЕГУ "экстрэмісцкай арганізацыяй", стала вядома 14 красавіка. Пад забарону трапілі таксама сімволіка і атрыбутыка ўніверсітэта.